Svavar Garðarsson, félagi í SVFA, býður félagsmönnum að kaupa hjá sér flugur á kostakjörum.  Svavar býður félagsmönnum að koma heim til sín að Skarðsbraut 17 miðvikudaginn 10., fimmtudaginn 11. og föstudaginn 12. apríl frá hádegi og fram á kvöld.  Allar flugur verða á 250 kr. stk., bæði laxa- og silungaflugur.

Nú styttist heldur betur í að veiðisumarið hefjist.  Fyrstu veiðisvæðin verða opnuð 1. apríl og má búast við að spenningur byggist jafnt og þétt upp hjá veiðimönnum.  Veiðimenn eru alla jafna bjartsýnir að eðlisfari og búast eflaust flestir við betra veiðisumri en í fyrra.  Við vonum það besta.

Sala veiðileyfa sumarsins gekk ágætlega en við eigum enn óseld 3 holl í Fáskrúð og 1 dag í Andakílsá.  Leyfin sem um ræðir eru 2.-4. júlí, 4.-6. júlí og 28.-30. september í Fáskrúð og 20. september í Andakílsá.  Áhugasömum er bent á að hafa samband við Bjarna, bjarnikriss@simnet.is eða Skúla, skulibg51@gmail.com.

Ný stjórn var kjörin á aðalfundi félagsins í janúar s.l.  Nýr formaður er Bjarni Kristófersson sem tekur við af Viðari Engilbertssyni.  Viðar situr áfram í stjórn ásamt þeim Skúla Garðarssyni og Sigurði Sævarssyni og Jóhanni Guðmundssyni, sem kemur nýr inn í stjórnina.

Félaginu hefur borist áríðandi tilkynning frá Landsambandi Stangaveiðifélaga og NASF.

Hjálögð er áfangaskýrsla um tilkynningar um regnbogasilung sem fundist hefur nýlega í ám og vötnum á Íslandi. Hátt í hundrað tilkynningar hafa borist og sýna þær alveg svart á hvítu að verndarsvæðin virka alls ekki.  Fiskurinn fer út um allt land.

Þessir fiskar eru mjög ágengir og eiga ekki heima í íslenskri náttúru. Þeir munu væntanlega valda sams konar skaða hér á landi og annars staðar í heiminum þar sem þeir hafa sloppið út í náttúruna. Hér eru hliðstæðar hættur og með innflutning og dreifingu á minkum á fjórða áratugum. Regnbogasilungur er sýnu verri, ef marka má reynslu annara þjóða.  Þar hefur hann verið mikill smitberi á sýklum, sjúkdómsvaldandi efnum og óæskilegum snýkjudýrum, m.a. sjávarlús sem hvarvetna margfaldast í vistkerfinu. Sem betur fer er enn óvissa um það hvort regnboganum muni takast að að fjölga sér í náttúru Íslands vegna hrygningarmynsturs hans.

Útbreiðsla regnbogasilungsins vekur hins vegar upp mjög alvarlegar spurningar um það hvað muni gerast með lax sem sleppur úr fiskeldiskerjum. Því ef regnbogasilungurinn fer í allar ár eftir að hann sleppur er engin ástæða til að ætla annað en að laxinn geri það sama.  Það hefur verið margsýnt fram á það að ekki er hægt að koma í veg fyrir að fiskur sleppi úr opnum sjókerjum og því er nánast tryggt að laxeldi í opnum sjókerjum muni valda óafturkræfum spjöllum á villtu laxastofnunum. Gangi áætlanir um stóraukið fiskeldi eftir gæti það því verið dauðadómur fyrir íslenska laxinn.

Vinsamlegast dreifið þessum upplýsingum og hjálpið okkur að finna allar þær ár og staði þar sem regnbogi kann að hafa fundist.

Bestu kveðjur,
Orri Vigfússon

formaður, NASF

Á meðfylgjandi mynd má sjá staðfesta dreifingu regnbogasilungs.

Á hádegi þann 11. ágúst var Fáskrúð komin í 62 laxa. Þeir staðir sem hafa verið að gefa laxa eru flestir á efra svæði árinnar eða frá Viðbjóð og upp í Katlafossa. Síðan er það Hellufljót af neðra svæðinu. Af öðrum veiðistöðum er lítið að frétta í vatnsleysinu en líkt og víða um land háir það veiðum töluvert.

Samkvæmt veiðimönnum sem luku veiðum á hádegi þann 18. júlí var búið að skrá 36 laxa í bókina í Fáskrúð.
Mest hefur komið á land úr Hellufljóti eða 12 laxar og þar næst á eftir 11 laxar úr Brúarstrengjunum. Aðrir veiðistaðir sem hafa verið að gefa laxa eru m.a. Katlafossar, Viðauki, Efri Strengur, Viðbjóður, Neðri Stapakvörn og Eirkvörn.
Veiðimenn voru sammála um að slangur af laxi sé vítt og breytt um ána en lítið minnkandi vatn og mikill hiti hefur áhrif á tökuviljann. Stærsti lax sumarsins til þessa kom á land í Katlafossum þann 17. júlí en það var glæsilegur 90cm hængur. Það verður spennandi að sjá hvað gerist á næstu vikum því nú er stækkandi straumur sem færir veiðimönnum vonandi enn meiri skemmtun við árbakkann.

25. júní 2016 við Efri Fossbakkahyl

Fyrstu laxar sumarsins eru komnir á land í Andakílsá.

Tveir fyrstu laxarnir fengust þann 24. júní í Efri Fossbakkahyl. Daginn eftir landaði veiðimaður svo laxi og var það einnig í Efri Fossbakka. Að auki urðu veiðimenn varir við lax í Nátthagahyl og væna bleikju niður við gömlu brú.

Sannarlega spennandi tímar framundan í Kílnum.

Veiðimaður með nýgenginn lax úr Andakílsá 25. júní 2016

RISE Veiðsýningin verður haldin í Háskólabíó næstkomandi fimmtudag (14.4)

Hún hefst með áhugaverðu málþingi kl.16.00, sem ber fyrirskriftina „Neikvæð umhverfisáhrif sjókvíaeldis, Verndum íslenska laxfiska“

Áætlað er að málþingi ljúki 18.30. Svo verða sýndar nokkrar stuttmyndir ásamt því að hin ýmsu fyrirtæki eru að kynna sína vöru.

Áhugasamir kynni sér meðfylgjandi hlekk   http://www.icelandangling.is/veidisyningin

SVFA óskar félagsmönnum sínum og fjölskyldum þeirra gleðilegra jóla.

Megi komandi ár verða ykkur farsælt og ekki síður fengsælt.

Stjórn S.V.F.A

Á hádegi í gær fengum við þær fréttir að Fáskrúð væri komin í 220 laxa. Holl sem þá lauk veiðum var með 13 laxa, sem sagt ennþá fínasti gangur í dölunum.

Við fengum einnig fréttir af Andakílsá í vikunni. Þar eru menn enn að slíta upp fiska þó eitthvað hafi örlítið hægt á því. Hún var þá komin í 301 lax.

Holl sem lauk veiðum á hádegi í gær, landaði 18 löxum. Miklar veðrabreytingar voru á meðan þeir voru við veiðar og fengu veiðimenn sinn skerf af roki og rigningu. Rigningarnar undanfarið hafa hleypt miklu lífi í laxgegnd og er nú mikið af laxi að sjá á stöðum eins og Hellufljóti og Neðri barka, en einnig er laxinn vel dreifður á milli staða og töluverð hreyfing á honum.  Fáskrúð stendur nú í 177 löxum og enn er nóg eftir !!