Stangaveiðifélag Akraness
Þumalputtareglan við val á flugum er að nota skærar flugur í björtu veðri og dökkar flugur í dimmviðri.
Á DÖFINNI
Laxveiðileyfi til sölu
Andakílsá - Silungasvæði
Veiða og Sleppa
Veiðitölur 2009:
Vissir þú að ...
félagið hafði Flekkudalsá á leigu í 35 ár, frá 1958 - 1993
23. ágúst 2010
Glimrandi veiði í Fáskrúð
Mjög góð veiði er í Fáskrúð þessa stundina en síðasta Skagaholl lauk veiðum með 29 laxa. Flestir fengust á flugu og slepptu veiðimenn yfir 20 löxum aftur í ána.
Hollið var komið með 14 laxa eftir þrjár vaktir en bætti um betur og landaði 15 löxum á síðustu vaktinni í morgun. Ofan á þessa góðu veiði misstu svo veiðimenn einnig fjöldan allan af löxum.
Ánægjulegt er að sjá þessa miklu veiði og kvótann ekki fullnýttann. Sýnir þetta sömuleiðis að flugan getur verið mjög sterkt agn í Fáskrúð. Fengust meðal annars flugulaxar í Barkakýlinu þar sem maðkurinn er jafnan fyrsta val veiðimanna sem þangað koma.
Fyrstu laxar tímabilsins úr Efri Streng komu á land í þessu holli og hefur þessi fornfrægi staður þá gefið þrjá laxa í allt sumar.
Veiðibókin stóð í 308 löxum á hádegi í dag en til samanburðar voru það 287 laxar á sama tíma í fyrra.
8. ágúst 2010
Fréttir af Andakílsá
Lítið er að frétta af Andakílsá en veiðitölur fóru í 170 laxa á hádegi 5. ágúst ef marka má skráningar í veiðibók.
Holl sem var við veiðar dagana 3-5 ágúst fékk 6 laxa. Komu þeir úr Volta, Þrjú og Efri Fossbakkahyl. Lax sýnir sig töluvert en tekur minna í þessum erfiðu aðstæðum.
Á meðfylgjandi myndum má sjá tvo kunnuglega veiðifélaga. Þetta eru fyrrverandi stjórnarmenn félagsins til margra ára, þeir Kjartan Guðmundsson og Karl Ó. Alfreðsson sem landa laxi í veiðistað Þrjú þann 4. ágúst síðastliðinn.
2. ágúst 2010
Tveir Maríulaxar úr Fáskrúð
Dagana 28-30. júlí í Fáskrúð lönduðu veiðimenn sextán löxum og fjórum var sleppt. Efri Brúarstrengur gaf 7 laxa, Efri Stapi 3, Neðstafljót 2, Hamrakvörn 2, Viðbjóður 1 og Neðri Barki 1.
Áin var þá komin í 151 lax á hádegi 30. júlí. Við fengum sendar nokkrar línur frá Bjarna Kristóferssyni en hann var við veiðar ásamt fjölskyldu sinni þessa daga.
"Talsvert af laxi virðist vera í ánni. Í Viðbjóði eru margir tugir, varlega áætlað 70-80 laxar. Svipaða sögu er að segja úr Neðstafljóti. Einnig sáust um 15 laxar í Hellufljóti, þar af einn mjög stór. Í Hamrakvörn sáust um 20 laxar. Þá sáust laxar í Börkunum báðum og í Blesu.
Vatnið er af skornum skammti og hafði reynslumesti veiðimaðurinn í túrnum orð á því að hann hefði ekki séð Fáskrúð jafn vatnslitla frá því hann kom þar fyrst um 1950. Hægt var að stikla yfir ána víða án fyrirhafnar.
Mikið líf var í ósnum á síðasta flóði þegar við vorum að hætta; stökkvandi lax um allt svo minnti á Kollafjörðinn á tímum hafbeitarinnar."
Meðfylgjandi myndir eru frá Bjarna en tveir maríulaxar komu á land í túrnum. Mæðginin Bylgja Kristófersdóttir og Fannar Björnsson, 7ára, fengu laxa í Neðstafljóti og Hamrakvörn.
28. júlí 2010
Stórlax úr Fáskrúð - komin í 135 laxa veiði
.jpg)
Síðasta stórstreymisparty sem stóð vaktina í Fáskrúð skilaði ánni í 135 laxa veiði sem verður að teljast mjög gott miðað við aðstæður.
Enn eiga tvo holl eftir að ljúka veiðum í júlí en mánuðurinn endaði í 152 löxum í fyrra.
Góð veiði er þrátt fyrir lítið vatn og mikinn hita og kom meðal annars á land glæsilegur stórlax hjá síðustu veiðimönnum. Hann mældist 88 cm og 7 kg og er því stærsti laxinn úr ánni til þessa.
Alls landaði hollið sextán löxum og slepptu veiðimenn fjórum þeirra. Vel veiddist í Neðstafljóti en einungis einn kom á land úr Efri Brúarstreng. Viðbjóður er sömuleiðis smekkfullur af laxi þessa stundina.
Fjórtan pundarann fékk Jónas Geirsson í Barkakýlinu og höfum við nú til birtingar nokkrar myndir frá ferð þeirra félaga.
Við hvetjum sömuleiðis aðra veiðimenn á vegum félagsins að senda okkur myndir frá ferðum sínum á netfangið ritari@svfa.is
26. júlí 2010
Fáskrúð komin í 120 laxa við erfiðar aðstæður
Skagaholl sem hóf veiðar í dag við afar erfiðar aðstæður, lítið vatn og gríðarlegan vatnshita, hafði landað 87 cm laxi úr Neðri Barka þegar fréttaritari ræddi við þá nú um klukkan 18. Fáskrúð hefur nú skilað 120 löxum í bók en tölur sem við höfum frá 23. júlí í fyrra sýna að á svipuðum tíma eða þrem dögum fyrr, voru laxarnir 92 talsins. Athygli vekur að síðustu holl veiddu vel þrátt fyrir aðstæður, fengu ýmist kvótann eða gerðu betur.
Stórlaxinn sem veiðimenn fengu í Neðri Barka í dag tók agn veiðimanna í "kýlinu" svokallaða og er hann áætlaður tæp 13.5 pund eða 6.7 kg samkvæmt kvarða Veiðimálastofnunar. Augljós merki þess að laxinn hafi barist við miklar grynningar á leið sinni upp ána voru áberandi á kviði laxins.
Engin væta hefur gert vart við sig í Dölunum sem aukið getur vatnsmagn í Fáskrúð en laxinn safnast saman á nokkra staði eins og t.d. Katlafoss, Neðri Barka, Viðbjóð og Brúarstrengina. Einnig höfðu veiðimenn á orði að eitthvað af laxi hefði komið undanfarið úr Hávaða, en Hellufljótið hafi verið þögult sem gröfin eftir að hafa gefið nokkra laxa um miðjan mánuðinn.
Við uppfærum fréttir úr Fáskrúð um leið og þær berast og fáum vonandi nokkrar myndir til birtingar með.
18. júlí 2010
Fáskrúð og Andakílsá
Andakílsá fór yfir 100 laxa múrinn í síðustu viku og er það svipuð veiði og á sama tíma í fyrra.
Skagadagarnir 8-10 júlí gáfu 18 laxa veiði. Holl sem veiddi stórstreymisdagana 12-14. júlí fékk 16 laxa og missti töluvert af löxum, en takan var oft á tíðum grönn á bæði flugu og maðk að sögn veiðimanna. Hollið þar á eftir landaði svo 17 löxum.
Veiðimenn voru að fá laxa á fjölbreytilegum veiðistöðum eða allt frá stað nr. 3 til 13. Hollið 12-14 júlí landaði t.a.m. löxum úr veiðistöðum þrjú, fjögur, fimm, ellefu, tólf og þrettán.
Fáskrúð stóð í 75 löxum á hádegi 16. júlí en afar lítið vatn skilaði litlum sem engum nýjum laxi upp í ána í kringum stórstreymið þann 13. júlí. Skagahollið 12-14 júlí landaði 8 löxum og næsta holl var með 6 laxa.
Hellufljótið sem gaf ekki lax fyrr en í ágúst á síðasta tímabili hafði þann 16. júlí skilað 4 löxum á land í vatnsleysinu sem nú ríkir í Dölunum.
Mynd; Ásgrímur Kárason með lax úr Hellufljóti 15. júlí. Ljósm. Jónas Geirsson