Fáskrúð náði aðeins að klóra í bakkann í september en Andakíll var slappur í allt sumar.  Lokatölur í Fáskrúð eru 220 laxar og þar af veiddust 100 laxar í september.  Meðalveiði í ánni frá árinu 2000 eru 254 laxar.

Í Borgarfirðinum var veiðin almennt léleg og var Andakíllinn engin undantekning á því.
Lokatölur sumarsins eru 113 laxar miðað við 379 laxa í fyrra og meðalveiði upp á 265 laxa frá árinu 2000.

Félaginu hefur borist áríðandi tilkynning frá Landsambandi Stangaveiðifélaga og NASF.

Hjálögð er áfangaskýrsla um tilkynningar um regnbogasilung sem fundist hefur nýlega í ám og vötnum á Íslandi. Hátt í hundrað tilkynningar hafa borist og sýna þær alveg svart á hvítu að verndarsvæðin virka alls ekki.  Fiskurinn fer út um allt land.

Þessir fiskar eru mjög ágengir og eiga ekki heima í íslenskri náttúru. Þeir munu væntanlega valda sams konar skaða hér á landi og annars staðar í heiminum þar sem þeir hafa sloppið út í náttúruna. Hér eru hliðstæðar hættur og með innflutning og dreifingu á minkum á fjórða áratugum. Regnbogasilungur er sýnu verri, ef marka má reynslu annara þjóða.  Þar hefur hann verið mikill smitberi á sýklum, sjúkdómsvaldandi efnum og óæskilegum snýkjudýrum, m.a. sjávarlús sem hvarvetna margfaldast í vistkerfinu. Sem betur fer er enn óvissa um það hvort regnboganum muni takast að að fjölga sér í náttúru Íslands vegna hrygningarmynsturs hans.

Útbreiðsla regnbogasilungsins vekur hins vegar upp mjög alvarlegar spurningar um það hvað muni gerast með lax sem sleppur úr fiskeldiskerjum. Því ef regnbogasilungurinn fer í allar ár eftir að hann sleppur er engin ástæða til að ætla annað en að laxinn geri það sama.  Það hefur verið margsýnt fram á það að ekki er hægt að koma í veg fyrir að fiskur sleppi úr opnum sjókerjum og því er nánast tryggt að laxeldi í opnum sjókerjum muni valda óafturkræfum spjöllum á villtu laxastofnunum. Gangi áætlanir um stóraukið fiskeldi eftir gæti það því verið dauðadómur fyrir íslenska laxinn.

Vinsamlegast dreifið þessum upplýsingum og hjálpið okkur að finna allar þær ár og staði þar sem regnbogi kann að hafa fundist.

Bestu kveðjur,
Orri Vigfússon

formaður, NASF

Á meðfylgjandi mynd má sjá staðfesta dreifingu regnbogasilungs.

Félagar SVFA hafa nú lokið veiðum í Fáskrúð þetta tímabilið.  SVFR mun loka ánni og veiða til 30. september.

Síðast hollið okkar lauk veiðum 26. sept og  veiddu 14 laxa, 10 á flugu og 4 á maðk.  Miklir vatnavextir og leiðinda veður hefur verið í Dölunum síðustu daga en greinilega talsvert af fiski í ánni sem er jákvætt. Tæplega 100 laxar hafa veiðst það sem af er september í ár eða uþb. helmingur veiddra laxa í sumar.

Holl sem var að klára veiðar í dag, 12.sept. í Fáskruð, landaði 10 löxum.  Vatnsstaða árinnar lagaðist verulega um helgina og ekki var að sökum að spyrja, veiðin tók að glæðast.

Sex laxar veiddust í Efri streng, tveir úr Laxhyl og sitthvor úr Matarpollum og Viðauka.

Veiðibókin stendur í 165 löxum.

Veiðimenn sem þekkja Fáskrúð eins og handabakið á sér gerðu góða ferð í Dalina um mánaðarmótin ágúst/september.  Náðu þeir 12 löxum á 2 dögum þar af einum lúsugum en óslegnum úr Hellufljótinu. Fiskarinir voru að veiðast um alla á og lax á öllum helstu stöðum.  Þegar þeir yfirgáfu svæðið 2. september stóð veiðibókin í 135 löxum.  Um sömu mánaðarmót í fyrra var veiðin komin í 195 laxa.  Vatnsbúskapur í Dölunum er búinn að hafa veruleg áhrif á veiðina í ágústmánuði en það er mál veiðimanna að fiskmagn sé í góðu meðallagi.

Veiðisumarið í Borgarfirðinum hefur almennt verið dapurt.  Veiðin í Andakílsá er engin undantekning, því einungis höfðu veiðst 95 laxar úr ánni þann 4. september.  Vatnsstaða árinnar er í lágmarki.  Til samanburðar voru komnir 307 laxar upp úr ánni á sama tíma í fyrra, sem reyndar var yfir meðallagi.

Á hádegi þann 11. ágúst var Fáskrúð komin í 62 laxa. Þeir staðir sem hafa verið að gefa laxa eru flestir á efra svæði árinnar eða frá Viðbjóð og upp í Katlafossa. Síðan er það Hellufljót af neðra svæðinu. Af öðrum veiðistöðum er lítið að frétta í vatnsleysinu en líkt og víða um land háir það veiðum töluvert.

Veiðimenn sem veiddu 25.-27. júlí lönduðu 6 löxum og misstu álíka marga.   Sögðust þeir hafa séð talsvert magn af fiski í ánni en vatnsstaðan orðin óþægilega léleg auk þess sem talsverður vindur var í Dölunum þessa daga.  Tökuvilji laxins var lítill og takan grönn.   Um miðjan dag 27. júlí voru 49 laxar skráðir í veiðibókina.

Á hádegi 24. júlí voru komnir 45 laxar á land í Andakílsá.  Þrátt fyrir stórstreymi síðustu daga þá hefur það ekki dugað til þess að laxinn gengi upp.  Frekar skrýtið ástand í ánni en skv. veiðimönnum sem luku veiðum í gær (24. júlí) urðu þeir ekki varir við fisk nema á einum stað, Fossbakka efri (nr. 4).  Nánst öll veiðin hefur komið upp úr veiðistað nr. 4  það sem af og t.a.m. hefur engin lax komið upp úr Nátthagahyl (nr. 6) sem hefur undanfarin ár verið gjöfull.

Samkvæmt veiðimönnum sem luku veiðum á hádegi þann 18. júlí var búið að skrá 36 laxa í bókina í Fáskrúð.
Mest hefur komið á land úr Hellufljóti eða 12 laxar og þar næst á eftir 11 laxar úr Brúarstrengjunum. Aðrir veiðistaðir sem hafa verið að gefa laxa eru m.a. Katlafossar, Viðauki, Efri Strengur, Viðbjóður, Neðri Stapakvörn og Eirkvörn.
Veiðimenn voru sammála um að slangur af laxi sé vítt og breytt um ána en lítið minnkandi vatn og mikill hiti hefur áhrif á tökuviljann. Stærsti lax sumarsins til þessa kom á land í Katlafossum þann 17. júlí en það var glæsilegur 90cm hængur. Það verður spennandi að sjá hvað gerist á næstu vikum því nú er stækkandi straumur sem færir veiðimönnum vonandi enn meiri skemmtun við árbakkann.