Fyrsta flugulaxinum úr Andakílsá var landað nú laust fyrir klukkan hálf níu í kvöld. Um hálftíma síðar kom annar á land einnig á flugu.

Laxarnir fengust í Efri Fossbakkahyl og fengu þeir bræður Árni og Jónmundur Ingólfssynir laxana á rauða frances. Árni tók þann fyrri en það var fallegur lúsugur 5 punda hefðbundinn Andakílsárlax. Jónmundur kom stuttu síðar og landaði einum eins til viðbótar og kórónaði daginn.

Morgunvaktin var heldur róleg hjá þeim félögum en strax í kvöld urðu þeir varir við líf í veiðistöðum þrjú og fjögur. Það má því segja að júní - júlí gusan sem við þorðum að búast við sé farin að gera vart við sig.

Áin er nú komin í fimm laxa og hefur þar með jafnað júníveiðina frá því í fyrra. Ánægjulegt er að sjá að fjórir af þeim fimm löxum sem komnir eru úr kílnum hafa komið í veiðistað fjögur eða Efri Fossbakkahyl.

Fréttaritari var á staðnum þegar fyrri laxinum var landað í kvöld og náði nokkrum myndum. Myndasyrpu má sjá með því að smella á meira.

– Við munum næst koma með fréttir af Fáskrúð í Dölum, Andakílsá og Laxá í Leirársveit um eða eftir næstu helgi. Góðar stundir.

Mynd; Árni Ingólfsson með fyrsta flugulaxinn úr Andakílsá sumarið 2009 (Ljósm. AMK)

Myndasyrpa:

Árni búinn að setja í hann og spennan leynir sér ekki. (Ljósm. AMK)

Bræðurnir bíða átekta. (Ljósm. AMK)

Tilraun eitt við löndun. (Ljósm. AMK)

Út í vildi laxinn aftur og því var hann þreyttur aðeins lengur. (Ljósm. AMK)

Stutt í að sá silfraði endi á mölinni. (Ljósm. AMK)

Kominn í háfinn góða, þessi átti ekki að sleppa – enda dýrmætur lax fyrir veiðimann og félaga.(Ljósm. AMK)

Deginum svo sannarlega bjargað fyrir horn. (Ljósm. AMK)

Bræður að vonum sáttir við aflann. (Ljósm. AMK)

Árni með fyrsta flugulaxinn úr Andakílsá sumarið 2009 – fallegur 5 pd. lax tekin á rauða frances. (Ljósm. AMK)

Related Images:

Frekar rólegt hefur verið við Andakílsá síðustu daga en fyrstu laxarnir frá því í opnun komu á land í dag sunnudaginn 28. júní. Ein 2.5 kg hrygna fékkst í veiðistað Þrjú og ein 3.2 kg hrygna við Efri Fossbakkahyl. Veiðimenn urðu ekki varir við neina laxa fyrir utan þessa tvo. Allir þrír laxarnir til þessa hafa fengist á maðk.

Næstu daga munu skagamenn standa við veiðar í Andakíl og er óskandi að það komi góð gusa af laxi upp í ána í tilefni af því. Um mánaðarmótin júní og júlí í fyrra lentu veiðimenn í göngu og kraumuðu strengirnir í veiðistöðum númer 3 og 6 á tímabili.

Þegar fréttaritari kíkti við í kílnum í kvöld var dimmt yfir, rigningarúði og logn.

Af silungasvæðinu eru komnar 12 bleikjur og 1 lax. Laxinn fékkst á milli brúa á maðk þann 27. júní og vó 3.5 kg. Búast má við því að laxarnir verði eitthvað fleiri af silungasvæðinu í sumar þar sem vel hefur gengið að selja á svæðið en oft hafa veiðitölur liðið fyrir litla ástundun.

Mynd; Fallegt augnablik frá mánaðarmótum júní og júlí í fyrra þegar fyrsta almennilega gangan af laxi kom í ána. (Ljósm. AMK)

Related Images:

Nokkuð af laxi hefur kroppast upp síðan áin var opnuð með 8 laxa veiði um síðastliðna helgi. Nú hefur áin gefið samtals 18 laxa á 6 dögum. Undanfarna daga hafa verið að koma á land allt frá einum og upp í þrjá á dag. Þetta gerir meðaltal upp á þrjá laxa á dag sem er þokkalega gott en júníveiðin hefur margoft verið tregari en þetta.

Eftir opnun hafa flestir laxarnir komið úr Laxfossi fyrir utan einn sem kom af Grettisbreiðunni miðvikudaginn 24. júní og einn í Eyrarfossi fyrir hádegi föstudaginn 26. júní, þar var um að ræða myndarlega 84 cm hrygnu.

Nýjir fiskar renna sér inn í Laxfoss daglega og laxinn er greinilega á ferðinni því veiðimenn sem voru við ána á fimmtudaginn settu í tvo laxa í Merkjastrengjum en misstu báða.

Fyrir þá sem lítið þekkja til á svæðinu eru Merkjastrengir stutt fyrir ofan Breiðafoss, Ljónið og Sunnefjufoss eða á næsta svæði fyrir ofan Laxfoss.

Á miðsvæðinu frá Merkjastrengjum og upp að Eyrarfossi hefur lítið sem ekkert verið að gerast. Laxastiginn í Eyrarfossi opnaði fimmtudagskvöldið 25. júní og má þá búast við því að laxar gangi fram á efri svæðin og upp í Eyrarvatn fljótlega.

Alls eru þá komnir 12 úr Laxfossi, 2 í Sunnefjufossi, 2 í Eyrarfossi, 1 úr Vaðstrengjum og 1 af Grettisbreiðunni.

Á fimmtudaginn fékk Þorsteinn Vilhjálmsson málari þrjá laxa á stuttum tíma úr Laxfossi og bauð upp á sannkallaða veiðisýningu fyrir viðstadda. Tveir laxanna tóku flugu og í bæði skiptin óðu þeir stjórnlausir niður úr hylnum. Þeim var svo að lokum landað á eyrinni niður af Vaðstrengjunum. Myndasyrpu má sjá með því að smella á meira…

Mynd; Þorsteinn Vilhjálmsson ásamt sérlegum aðstoðarmanni með fyrsta laxinn af þremur þann daginn. (Ljósm. AMK)

Myndasyrpa – Staðið við veiðar í Laxfossi fimmtudaginn 25. júní 2009

 Af látbragðinu mátti sjá að málarinn var ekki í fyrsta skipti í fossinum. (Ljósm. AMK)

Steini strax búinn að setja í þann fyrsta (Ljósm. AMK)

Eftir stutta stund í hylnum er stefnan tekin niður Vaðstrengina. (Ljósm. AMK)

Mikil hlaup og mikið gaman. (Ljósm. AMK)

 Stutt í löndun. (Ljósm. AMK)

Fyrsta laxinum landað snyrtilega. (Ljósm. AMK)

 Svona á að taka þetta, feðgarnir með fallegan lax eftir skemmtilega viðureign. (Ljósm. AMK)

Málarinn kominn með annan lax og allt í keng. (Ljósm. AMK)

Síðari laxinn dansaði á sporðinum og sprengdi hylinn. (Ljósm. AMK)

Og þá er bara að hlaupa !
(Ljósm. AMK)

Þarna var eltingarleikurinn rétt að byrja, þessum var landað mun neðar en fyrri laxinum. (Ljósm. AMK)

Við þökkum Steina fyrir að fá að mynda allan hamaganginn. Svona á veiði að vera !

Related Images:

Laxá í Leirársveit opnaði að morgni sunnudagsins 21. júní og endaði dagurinn í 8 löxum.

Af stærri löxum er það að frétta að ein 80 cm hrygna fékkst í Laxfossi á flugu og einn 80 cm hængur í Eyrarfossi á Sunray Shadow. Löxunum var báðum sleppt að lokinni mælingu. Einn 5.5 kg fiskur kom svo upp úr í Sunnefjufossi á maðk og einn 5.0 kg úr Vaðstrengjum.

Dagur tvö við Laxá var heldur rólegri en þá komu aðeins tveir laxar á land úr Laxfossi á morgunvaktinni og enginn á þeirri síðari samkvæmt veiðibók. Samtals 10 laxar á tveim dögum verður að teljast sæmilegt en veiðimenn bíða spenntir eftir dögum SVFA í ánni sem eru 5-7 júlí.

Alls eru þá komnir 6 úr Laxfossi, 2 í Sunnefjufossi, 1 í Eyrarfossi og að lokum 1 úr Vaðstrengjum.

Andakílsá hafði í gærkvöldi ekki gefið neinn lax frá því á opnunardaginn 20. júní.

Mynd; Laxá í Leir – Landað við Bakkastreng í september 2008. (Ljósm. AMK)

Related Images:

Andakílsá opnaði eins og kunnugt er að morgni 20. júní og voru það bjartsýnir skagamenn sem mættir voru til veiða. 

Að sögn veiðimanna var rólegt yfir veiðiskapnum yfir daginn í heild en engu að síður dró til tíðinda á fyrstu vaktinni en þá gerðist eitthvað sem enginn bjóst við. Settu þeir í og lönduðu fallegri lúsugri 5 pd. hrygnu við veiðistaðinn Fossabakka Efri (nr 4).

Ekki vitum við hvað það er langt síðan lax fékkst síðast á opnunardegi í Andakíl og hvað þá á þessum veiðistað en þessi fornfrægi staður hefur verið mjög dapur og seinn í gang undanfarin ár. Veiðimenn urðu einnig varir við eitthvað líf, líklega lax, í veiðistað þrjú en þar var tekið í agn veiðimanns og því svo skilað aftur stuttu síðar. Sá fiskur sýndi sig aldrei.

Fleiri laxaferðir urðu veiðimenn ekki varir við en eitt er víst að þessir voru líklega ekki þei
r einu á ferðinni svona snemma.

Það er ánægjulegt að laxinn sé farinn að láta sjá sig í kílnum en samkvæmt veiðibókum SVFR veiddust aðeins örfáir laxar þar í júní í fyrra eða 5 af 839 löxum yfir allt sumarið.

Mynd; Fyrsti laxinn úr Andakílsá á opnunardaginn 20. júní (Ljósm. Dóra Þóris.)

Related Images:

Stutt er í opnanir þeirra laxveiðiáa sem félagið hefur selt veiðileyfi í fyrir sumarið en árnar eru þrjár talsins.

Andakílsá opnar laugardaginn 20. júní en fyrsti dagur félagsins er samt sem áður mánudagurinn 22. júní. Í fyrra fengust laxar fyrstu dagana við veiðistaðinn Nátthagahyl og verður gaman að sjá hvort það sama sé upp á teningnum nú. Júnímánuður hefur undanfarin ár verið afar rólegur í kílnum og göngur ekki byrjað af krafti fyrr en dagatalið segir júlí.

Laxá í Leir opnar að morgni sunnudagsins 21. júní og munum við fylgjast með gangi mála fyrstu dagana en félagið hefur til umráða dögunum 5-7 júlí. Þetta eru flottir dagar og þarna má búast við því að stærri göngurnar fari að láta sjá sig.

Loks opnar svo Fáskrúð í Dölum 30. júní en það kemur í hlut SVFR að eiga fyrstu vikuna í ánni nú. Fyrstu dagar félagsins verða svo frá 6-8 júlí og verðum við með fréttir af Fáskrúð þegar þær berast.

Gleðilegt veiðisumar !

Related Images:

Við minnum á að ennþá er hægt að fá stangir í Laxá í Leirársveit fyrir komandi sumar en í boði eru stakir dagar með skiptingu á miðjum degi.

7. sept – 8. sept (mánud-þriðjud) – 33.100 st. – (46.000 kr. með fæði fyrir einn)
8. sept – 9. sept (þriðjud-miðvikud) – 33.100 st. – (46.000 kr. með fæði fyrir einn)

Fyrir þá sem vilja kynna sér Laxá betur er hægt að lesa meira um þessa margrómuðu fluguveiðiperlu og skoða flott tíu mínútna kynningarmyndband af veiðisvæðinu hér.

.

Allir áhugasamir félagsmenn sem og aðrir geta haft samband við Skúla gjaldkera í síma 431-3099 eða 895-2282.

.

Related Images:

Meðalfellsvatn apríl 2007 – Það getur verið fallegt undir kvöld í Kjósinni

Meðalfellsvatn apríl 2007

Meðalfellsvatn apríl 2007 – Flottir staðbundnir urriðar, teknir á litlar Phaesant Tail og Krókinn

Related Images:

Sem ungur strákur á Akranesi upplifði ég marga veiðitúra á svæði SVFA, en karl faðir minn var mjög áhugasamur stangveiðimaður. Margar minningar á ég frá þessum tíma, varðandi veiði, helst þær að karlinn kom oft heim með svo mikið af laxi að gólfið í þvottahúsinu var þakið laxi. Laxinn var svo eldaður og mikið var hann (og er enn) góður með nýjum kartöflum og sméri. Mín gæfa var að oft var um fjölskylduveiði og flengdumst við um í gamla rússnenska eðalvagninum,
sérstaklega í dalina og þá helst í Haukadalsá, Flekkudalsá og Fáskrúð. Okkur systur fannst alltaf einstaklega gaman að vera í Flekku, þaðan eigum við margar og góðar minningar. Ein er þó minning sem ekki var skemmtileg en það var þegar fiskiflugur höfðu hertekið húsið og við þurftum að byrja túrinn á að fæla þær út, sem tókst. Okkur þótti veðursæld Flekkudals mikil, en hinsvegar er í minningunni ávallt vont veður í Fáskrúð. Það var því ekki Fáskrúð sem heillaði sérstaklega þegar kom að því að ég fór sjálfur að veiða fyrir alvöru, heldur var Flekka, Haukan og fleiri aðrar ár ofar á vinsældalistanum.
Í Fáskrúð fór ég þrátt fyrir allt á undan hinum ánum, og kannski vegna minninganna, kom áin mér mikið skemmtilega á óvart og hefur síðan verið ómissandi hluti af veiðisumrinu. Það var 1998 sem ég fór fyrst í Fáskrúð og í veiðibók sem ég held stendur eftirfarandi texti um þessa veiðiferð:

Fáskrúð líður fyrir hve vatnsbúskapur hennar er takmarkaður, á þurrum sumrum má vaða hana á spariskónum, en öðrum stundum er hún eins og fljót yfir að líta. Þegar vatnleysið er sem verst safnast fiskurinn saman við brúna á göngutíma og þá er oft hægt að gera góða veiði, en á móti er leitt að sjá að fiskurinn hefur engin tök á að komast upp í ána, hann er einfaldlega tíndur upp í brúarstrengjunum efri og neðri. Við höfum oft rætt um að það þyrfti hreinlega að stjórna þessari veiði úr efri brúarstreng þannig að ef vatnsmagn leyfir, að fiskurinn hefði tök á að komast upp í ána áður en hann er veiddur, og oftast drepinn.

Bestu kveðjur með ósk um gleðilegt veiðisumar.

Ingólfur Þorbjörnsson

Related Images:

Varla hefur verið hægt að kvarta undan vatnsleysi í lok veiðitímabilsins 2008 en þann 19. september var við veiðar í Andakílsá skagamaðurinn Svavar Garðarsson ásamt fjölskyldu. Ekki spillti fyrir það laxamagn sem gengið hafði í ána um sumarið en metveiði var í ánni alls 839 laxar en fyrra met hljómaði upp á 321 lax og stóð óhaggað síðan 1975.

Eins og sjá má á myndunum sem við fengum sendar er áin sem eitt beljandi stórfljót og hefur það vissulega verið skemmtileg áskorun að eiga við annars þessa nettu veiðiá við svona aðstæður.

Laxarnir voru að sína sig langt upp á bílastæði eða þar sem eðlilegt væri að leggja bifreið við venjuleg vatnsskilyrði. Félagið þakkar Svavari kærlega fyrir myndirnar.

Andakílsárfossar í öllu sínu veldi.

Við veiðar á bílastæðinu í þremur.

Veiðilegur strengur.

Séð frá veiðihúsinu.

Þarna er bílastæði í eðlilegum skilyrðum.

Út í miðju fljóti.

Gríðarlegt vatnsmagn.

Ljósmyndir úr safni Svavars Garðarssonar

Related Images: