Í gær höfðu verið færðir til bókar 228 laxar við Fáskrúð. Skagahollið sem nú er við veiðar og kláraði þriðju og næst síðustu vakt sína í gærkvöldi hafði þegar henni var lokið landað 13 löxum. Fyrsta vaktin gaf 4 laxa og komu þeir úr Viðauka, Laxhyl, Viðbjóð og Rauðku en gaman er að geta þess að mjög langt er síðan lax fékkst í Rauðku síðast. Önnur vaktin gaf einnig fjóra laxa og komu þeir úr Neðri Stapa, Ármótum, Efri Streng og Stebbastreng. Þriðja vaktin gaf svo 5 laxa og komu þeir úr Neðri Streng, Efri Barka, Eirkvörn og tveir úr Laxhyl.

Það má því segja að lax sé víða að finna og t.a.m var laxinn sem veiddist í Efri Barka lúsugur frá sporði og upp fyrir haus. Einnig var lús að finna á löxunum úr Efri Streng, Viðbjóð og Ármótum.  Af þessum 13 löxum hafa 5 komið á flugu og hefur þeim öllum verið sleppt. Gott vatnsmagn er núna í Fáskrúð en þó tóku veiðimenn eftir töluverðum dagamun á vatninu þegar þeir héldu til veiða í gærmorgun.

Af 228 veiddum löxum í Fáskrúð hafa 179 veiðst á maðk, 38 á flugu og 11 eru óskráðir á agn. Af 38 flugulöxum hefur 18 verið sleppt aftur. Þá var 8 löxum sleppt í einu skagahollinu nú fyrir stuttu, þrem löxum í öðru fyrr í sumar og 5 löxum hefur verið sleppt á fyrstu þremur vöktunum hjá þeim sem nú eru við veiðar. Af þessu að dæma eru veiðimenn af skaganum þokkalega duglegir við að sleppa en betur má ef duga skal!

Fréttaritari var á staðnum í gær og fékk að fylgja þeim félögum Ingólfi og Kalla eftir eina vakt. Nokkrar myndir má sjá með því að smella á meira… Veiðibók fyrir árið 2009 er í vinnslu og fréttauppfærslu frá síðustu vakt þeirra félaga er að vænta í kvöld.

UPPFÆRT kl 20:00: Þá eru komnar nýjar fréttir úr dölunum. Fjórða og síðasta vaktin gaf þrjá laxa í morgun, sitthvor laxinn kom úr Eirkvörn og Laxhyl á maðk en síðan einn úr Neðri Stapa á flugu. Endaði hollið þá í 16 löxum. Alls 10 á maðk og 6 á flugu. Að sjálfsögðu var öllum flugulöxum sleppt að viðureignum loknum. Fáskrúð er þá komin í 231 lax og tímabilið tæplega hálfnað.

Mynd; Veiðifélagarnir Ingólfur og Karl landa einum silfruðum við Laxhyl 12. ágúst (Ljósm. AMK)

Fréttaritari hitti veiðimenn við Fáskrúð 12. ágúst og fékk að fylgja þeim eftir eina vakt. Við veiðar voru þeir Ingólfur og Karl ásamt Hafsteini og Heimi.

Efri Brúarstrengur fallegur í góðu vatni. (Ljósm. AMK)

Kalli sleppir einum við Laxhyl. (Ljósm. AMK)

Ingólfur kastar flugu á Laxhyl, þar var töluvert líf. (Ljósm. AMK)

Kastað á Efri Streng. (Ljósm. AMK)

Kalli búinn að setja í einn sem skvettir sér í Neðri Streng, þessum var landað stuttu síðar. (Ljósm. AMK)

Stebbastrengur gaf Hafsteini og Heimi lax um morguninn. (Ljósm. AMK)

Laxhylur er gjöfull. (Ljósm. AMK)

Ingólfur með hann á. (Ljósm. AMK)

Létt stöng fyrir línu fjögur og fluga nr. 14 …Er hægt
að b
iðja um það betra?  (Ljósm. AMK)

Það var ekki leiðinlegt að sjá þann silfraða stökkva ítrekað á meðan glímt var við hann. (Ljósm. AMK)

Félagarnir tilbúnir að landa þeim silfraða. (Ljósm. AMK)

Frelsinu feginn fór laxinn aftur út í hylinn. (Ljósm. AMK)

Related Images:

Við vorum að fá nýjar fréttir úr dölunum frá skagahollinu sem veiddi í Fáskrúð dagana 3 – 5. ágúst. Bjarni Kristófersson var við veiðar ásamt fjölskyldu sinni og lönduðu þau alls 20 löxum á stangirnar tvær. Löxum umfram kvóta var að sjálfsögðu sleppt en að sögn Bjarna var að finna lax á nokkrum stöðum. 

Eitthvað virtist laxinn þó vera að ganga inn því flestir þessara voru nýgengnir. Tveir maríulaxar komu síðan á land hjá ungu og efnilegu veiðifólki !

Fáskrúð var komin í 181 lax þegar Bjarni og fjölskylda hættu veiðum á hádegi þann 5. ágúst. Þetta er góð tala miðað við dagsetningu og spurning hvort að áin nái 433 laxa múrnum síðan í fyrra.

Fyrsti lax sumarsins úr hinu fornfræga Hellufljóti kom á land í þessu holli en virkaði utan þess afar dapurt að sjá. Í póstinum frá Bjarna veltir hann því upp hvað megi betur fara við þennan einn af betri veiðistöðum fyrri ára í Fáskrúð…

…Annars var ekkert að sjá í Hellufljótinu og gaman væri að finna einhverja lausn til að fá fiskinn til að stoppa þar.  Spurning hvort þrengja megi fyrir ofan til að mynda sterkari straum niður í fljótið.  Það væri gott ef menn færu að velta þessu fyrir sér….

Það er rétt að Hellufljótið má muna sinn fífil fegurri hvað aflatölur varðar en hér áður fyrr gaf staðurinn um þriðjung aflans úr Fáskrúð ár hvert. Veiðin var reyndar góð árið 2008, en ef fréttaritari man rétt þá hefur veiðin heilt yfir verið fremur léleg undanfarin ár í Hellunni. Hvað veldur þessari tregðu veit enginn, eða hvað ?

Mynd; Telma Björk Helgadóttir og Orri Jónsson með maríulaxana sína úr Fáskrúð í Dölum. (Ljósm. úr safni Bjarna Kristófers)

Related Images:

Andakílsá hefur nú náð 241 laxa veiði og hefur flugan gefið flesta laxa eða 171 á móti 70 á maðk.

Júlímánuður gaf 207 laxa og það sem af er ágúst hafa 24 laxar verið færðir til bókar, 7 á flugu en 17 á maðk. 

Síðasta tveggja daga holl landaði 9 löxum á maðk og þar af einum dreka, 7.5 kg hæng úr Efri Fossbakkahyl.

Hægt er að sjá nýuppfærða veiðibók fyrir Andakílsá hér á vefnum.

Mynd; Nátthagahylur hefur gefið 53 laxa það sem af er sumri (Ljósm. AMK)

Related Images:

Á hádegi í dag stóð Andakílsá í 186 veiddum löxum og nálgast óðum 200 laxa markið. Helgarhollið í kílnum landaði 13 löxum og hollið þar á undan var með 20 laxa. Veiðin hingað til skiptist þannig að 46 hafa komið á maðk en 140 á flugu. Af þessum 140 löxum hefur tveimur verið sleppt aftur. 

Veiðin er mest fengin úr stöðum þrjú, fjögur og sex en einnig hafa komið laxar úr eitt, ellefu og tólf eða Sleifarkvörnum eins og sá staður heitir.  Í kvörnunum hefur að vísu verið feikigóð veiði á köflum og hafa komið á land alls 21 laxar úr þeim veiðistað.

Aflahæsti dagurinn í kílnum var 17. júlí en þá fengu skagamenn sem voru við veiðar samtals 17 laxa og alla á flugu. Veiðin þann dag skiptist á Fossbakkahyl Efri með 12 laxa, veiðistaður Þrjú með 3 laxa og 2 laxar komu úr Nátthagahyl. Þetta var sömuleiðis aflahæsta tveggja daga hollið til þessa með 24 laxa veidda frá 16 til 18. júlí.

Þyngsti laxinn í kílnum veiddist þann 15. júlí í veiðistað Þrjú á fluguna Sunray Shadow, laxinn var hængur sem vóg 6.0 kg og var mældur 85 cm.

Silungasvæðið við Andakílsá hefur gefið 9 laxa það sem af er sumri. Þann fyrsta 27. júní og nú síðast þann 23. júlí. Skráðar bleikjur í veiðibók eru rúmlega 30 talsins og sterkasta agnið á svæðinu er án efa maðkur. Hægt er að kaupa silungadaga SVFA á veiðileyfavefnum www.leyfi.is

Síðasta skagavika í Fáskrúð gaf að við teljum 35 laxa og var áin þá komin í rúmlega 100 laxa veiði nú fyrir helgi. Hollið sem veiddi frá 22 – 24. júlí fékk 12 laxa og hollið þar á undan fékk 15 laxa.

Að sögn veiðimanna sem voru í dölunum um miðja síðustu viku var laxinn byrjaður að bunka sig upp í Efri Brúarstreng og virkaði tregur til þess að ganga lengra upp ána þrátt fyrir að vatnsbúskapur hafi ennþá verið sæmilegur og ætti ekki að hamla göngum svo um munar.

Þyngsti laxinn til þessa veiddist í Miðfljóti á maðk þann 18. júlí og vóg 6.0 kg.

Mynd1; Kvöldsól við Fossbakkahyl Efri í Andakílsá (Ljósm. Maren Rut)
Mynd2; Veiðistaðurinn Viðbjóður við Fáskrúð í Dölum (Ljósm. Sigurþór Hólm)

Related Images:

Skagahollið sem var við veiðar í Andakílsá 16-18 júlí veiddi vel eða samtals 24 laxa. Veiðin skiptist niður á þrjá hefðbundna veiðistaði eða Þrjú, Fossabakka Efri og Nátthagahyl. Allir laxarnir fengust á flugu en veiðimenn settu í alls rúmlega 30 laxa. Mest kom upp úr Fossabakka efri eða veiðistað fjögur eins og hann er jafnan kallaður, þar fengust alls 15 laxar.

Frábært er að sjá hversu vel veiðist í byrjun tímabils í veiðistað fjögur eftir nokkur mjög léleg ár þar sem veiði var afar dapurleg í hylnum. Þessi fornfrægi veiðistaður virðist nú vera
að ná sínu gamla yfirbragði enda einn albesti veiðistaðurinn í ánni hér áður fyrr.

Vatnsmagn fer minkandi við Andakílsá og mat manna að mikil þörf sé á rigningum fljótlega. En þrátt fyrir þetta virðast skilyrðin bjóða upp á tökugleði og mikið líf. Það má því búast við sprengingu í aflatölum þegar það kemur rigning, ef hún kemur.

Mynd; Flugu kastað í Fossbakkahyl Efri (Ljósm. AMK)

Related Images:

Andakílsá hefur nú náð 100 laxa veiði eftir ágætis gengi undanfarna viku. Frá opnun hafa fengist 30 laxar á maðk en 70 laxar á flugu. Gefur þetta góða mynd af því hversu afbragðs fluguveiðistaði Andakílsá hefur upp á að bjóða og einfaldlega hversu sterkt agn flugan er á svæðinu umfram maðkinn.

Fréttaritari var við veiðar nú síðustu tvær vaktirnar í kílnum. Á þessu tveim vöktum komu á land 10 laxar, eða 5 á hvorri vakt. Alls fengust 7 á flugu og 3 á maðk. Veiðistaðir Þrjú, Fossbakkahylur Efri og Nátthagahylur gáfu allir laxa. Einn maríulax kom upp úr Nátthagahyl.

Að auki misstu veiðimenn 7 laxa, suma í löndun en aðra eftir snarpar og skemmtilegar viðureignir. Þeir veiðimenn sem veiddu í gærmorgun og fyrrakvöld misstu um 20 laxa samkvæmt gestabók í veiðihúsi. Nýr lax er að hellast inn og má því búast við að það verði gaman hjá næstu hollum og sömuleiðis góð veiði.

Einn 85 cm 12 punda hængur kom á land í gær en það telst einkum til tíðinda þar sem laxar um og yfir 8 pundum eru afar sjaldséðir á svæðinu. Laxinn rauk tvisvar á eftir flugunni hjá fréttaritara og negldi hana í síðara skiptið með látum. Laxinum var landað í gærkvöld við veiðistað Þrjú eftir vægast sagt rosalega viðureign. Veiðitæki voru nett stöng fyrir línu #6 og létt túpufluga. 

Nokkrar myndir frá því í gær og í dag má sjá hér fyrir neðan…

Mynd; Fallegur 85 cm hængur úr veiðistað Þrjú í Andakílsá (Ljósm. Heiðar Logi)

Tvær vaktir í Andakílsá 15 og 16. júlí 2009
 

Almar Geir landar maríulaxinum sínum við Nátthagahyl. (Ljósm. AMK)

Barátta við lax í veiðistað Þrjú, þessi slapp. (Ljósm. AMK)

Almar Geir við Nátthagahyl. (Ljósm. AMK)

Með stórlax á hinum endanum í miðri roku. (Ljósm. Heiðar Logi)

Öldugangur af þeim stóra (Ljósm. Heiðar Logi)

Stutt í löndun neðarlega í hylnum (Ljósm. Heiðar Logi)

Sæmilegur hængur kominn á land (Ljósm. Heiðar Logi)

Fallegur morgunafli við Nátthagahyl (Ljósm. AMK)

Related Images:

Skagamenn sem áttu 8 – 10. júlí við Andakílsá fengu 22 laxa og aldeilis ekki allt af hefðbundnum stöðum. Veiðistaðir þrjú, fjögur og sex gáfu þó einhverja laxa en svo voru að koma laxar úr minna þekktum veiðistað.

Guðmundur Valsson fór fyrir hollinu og sagði okkur frá því að þeir félagar hafi landað samtals 11 löxum úr veiðistað númer 12 eða Sleifarkvörnum. Mest fengu þeir á flugu á þessum tveimur dögum í kílnum eða 18 af 22 löxum og var Sunray Shadow sterk.

Veiðistaðurinn Sleifarkvarnir sést vel þegar setið er út á verönd við veiðihúsið og horft niður með ánni. Þetta er álitlegur veiðistaður og það hefur verið gaman að hitta á þann silfraða þarna.

Næstu dagar félagsins við Andakílsá verða 16 – 18. júlí og svo aftur 24 – 26. júlí.

Mynd; Ofarlega við Nátthagahyl í júlí 2008 (Ljósm. AMK)

Related Images:

Skagahollið sem var í Fáskrúð um helgina landaði 12 löxum. Alls var sett í 17 laxa en 5 af þeim höfðu betur í baráttu við veiðimenn.

Áin er þá komin í 22 laxa og eru þeir enn að veiðast mest á miðsvæðinu. Efri Brúarstrengur hefur gefið 3 laxa í sumar en næsti veiðistaður sem hefur gefið lax er Tjaldkvörn.

Laxinn virðist þó greinilega vera á ferðinni því veiðistaðir sem hafa verið að gefa undanfarið eru m.a. Viðauki, Leynir, Fýla, Silfurkvörn, Tjaldkvörn og Eirkvörn. Næsta vika í Fáskrúð verður á vegum SVFR og svo taka næst við dagar SVFA þann 18. júlí.

 Mynd; Brúarstrengirnir við Fáskrúð (Ljósm. AMK)

Related Images:

Stjórnar og árnefndarmenn eru nú við veiðar í Fáskrúð. Eftir þrjár vaktir höfðu fjórir laxar komið á land. Tveir úr Eirkvörn, einn úr Viðauka og einn úr Efri-Stapa. Lítið sem ekkert af nýjum laxi er að ganga.

Frá 30. júní til 7. júlí hefur áin skilað 9 löxum í bók. Sá fyrsti veiddist 1. júlí í Efri Barka.

Nú í byrjun tímabils hefur ekki fengist lax neðar en í veiðistaðnum Tjaldkvörn. Aðrir veiðistaðir eru Neðri-Stapi, Efri-Stapi, Viðauki, Viðbjóður, Eirkvörn og Efri-Barki.

Við færum frekari fregnir af Fáskrúð þegar þær berast.

Mynd; Eirkvörn við Fáskrúð í Dölum (Ljósm. AMK)

Related Images:

Holl sem lauk veiðum á vegum félagsins í dag við Laxá landaði rúmlega 20 löxum á tveim dögum samkvæmt veiðibók. Áin er nú komin í samtals 88 laxa.

Laxarnir í hollinu fengust víða og er einn t.d. skráður fyrir neðan Stekkjarnes en aðallega er veiðin frá Laxfossi og upp að Miðfellsfljóti. Enn er ekki kominn lax af efsta veiðistaðnum Breiðunni en einn kom úr Holunni þann 2. júlí. 

Alls eru þá komnir 44 úr Laxfossi, 17 Miðfellsfljót, 5 Sunnefjufossi, 5 af Grettisbreiðu, 4 Eyrarfossi, 3 Vaðstrengjum, 2 Ljóninu, 2 Urðarstreng, 1 Holunni, 1 Grettisstrengjum, 1 Merkjastrengjum, 1 Bakkafljóti, 1 Kvörninni og 1 neðan Stekkjarnes.

Næstu dagar á vegum félagsins í Laxá verða 7 – 9 september og verður fréttaflutningur af svæðinu lítilsháttar þangað til nær dregur september.

Mynd; Þorsteinn Vilhjálmsson glímir við lax í Laxfossi þann 26. júní 2009 (Ljósm. AMK)

Related Images: